The Hartlib Papers

          SERENISSIMO & CELSISSIMO PRINCIPI

                  Domino OLIVARIO

        ANGLIÆ, SCOTIÆ AC HYBERNIÆ PROTECTORI.

                              Domino nostro clementissimo

          SERENISSIME & POTENTISSIME DOMINE,

                DOMINE CLEMENTISSIME.

Qvandoqvidem Serenitas Vestra toto tempore gloriosæ Gubernationis Suæ dùm favente Divino Numine, tria potentissima Regna rexit, zelum suum ergà Christianam Reformatam Religionem nostram, multis nominibus abundè declaraverit, & Se re ipsâ Protectorem & Defensorem Orthodoxæ Fidei testata sit. Nos miserè afflicti, Nobilitas in Regali Borussia Reformata, ad Serenissimem Vestram tanqvàm ad Sacram confugimus Anchoram, humillimè Serenitati Vestræ Exponentes; Qvod cùm Serenissimus Rex Sveciæ, victoriosissimis Armis suis totam hanc fermè Provinciam Borussiæ occupaverit, & verendum sit, nè instinctu malevolorum nostrorum, Exercitio Religionis, unâ cùm Bonis nostris (:prout jam nonnullis nostrûm Bona & Possessiones ademta, & alijs distributa sunt:) privemur, & cùm maximo detrimento Religionis nostræ opprimamur: Nos autem firmiter credamus, Serenitatem Vestram non passuram, nos vel in Bonis nostris, vel libero Religionis nostræ Exercitio, à Confoederato & qvidem Evangelico Rege turbari, humillimè Serenitatem Vestram rogamus, Eidemque supplicamus, dignetur apud Serenissimum Regem Sveciæ, intercedendo authoritatem Suam interponere, ut nobis Iura & Privilegia nostra, Liberumque Religionis nostræ Exercitium Possessiones atque Bona nostra, benignissimè conservare, & ijs qvibus jam ademta sunt, rursum ea restitui curet. Contributionibusque gravissimis, respectu habito Serenitatis Vestræ, Defensoris Fidei nostræ, allevare gratissimè velit. Hanc Serenitatis Vestræ Pietatem, et ergà puram Religionem affectum, Deus Ter. Opt: Max: omnimodâ prosperitate, & felicissimis Rerum successibus, qvos à Divina Sua Bonitate, pro Serenitate Vestrâ indefessis precibus implorare non desinemus, remunerabitur; & nos humillimis Officijs nostris demereri semper studebimus. Protectioni & Gratiæ Serenitatis Vestræ nos humillimè commendantes,

                    Serenissimæ Celsitudinis Vestræ

                                Humillimi Clientes

Dantisci d. 15 Martij         Nobiles Regalis Prussiæ,

   Anno 1656.                    Reformatæ Religioni

                                        addicti. /.