The Hartlib Papers

[MS torn, word missing] attinet experimentum nostrum Mechanicum circa Regulum Antimonij, id erat hujus modi. Cùm observâssem (maximè in his oris) plurimos atque stupendos effectus in curandis pecoribus æquè ac hominibus à multis deploratis intemperiebus et morbis profectos à solo usu poculi Antimonialis vulgaris: concessi petitioni seriæ amici unius et alterius (qui magnam ejus rei experientiam habebant) ut pararem illis Reguli melioris notæ, quantum vellent, et in præparando curam haberem quantam possem, ut probè purus evaderet. Et cùm scirem quòd Sal Tartari præcipitaret Regulum valdè purum, cupiens minuere nonnihil sumptûs, emi 50 circiter ollas cineris Dantiscani optimi, quem solutum rursus, et filtratum redegi in salem candidissimum (qualem ferè Chirrurgi adhibent in Causticis:) Hujus 12 uncias admiscui Antimonij crudi uncijs 8 in crucibulo forti, et ministravi ignem sufficientem ad spatium temporis bene longum in fornace ventosâ. Atque ita subinde miscui salem et Regulam antimonium in eâdem proportione, nimirum 12 uncias salis ad 8 uncias antimonij, donec collegissem. Reguli quantum putabam satis fore. Regulum ita collectum et à scorijs mundatum rursus miscui in igne fusionis forti, octonis uncijs dicti Reguli addens denas uncias salis purificati, et in igne detinui ad tempus justum atque ita perrexi, donec iterum miscendo consumsissem omnem meum Regulum.

Hunc Regulum remotum ab igne, et separatum [word missing, MS torn] suis miscui tertiâ vice, additis æquali proportione ad octonas uncias Salis totidem uncijs Reguli, et semper in igne fusionis detinui diutius quàm antè. Itaque tandem obtinui Regulum meum pulchrè mundum, postquam omnem tertiâ vice sali dicto miscueram; contigitque ut fractus ostenderet minutissima granula. Cujus Reguli, cùm essem cupidus experiundi, quomodo operaturus esset, sumsi primùm egomet 4 circiter uncias in plura frusta ruditer fractas, et vino infudi ad horas circiter 12, et hausi illius infusionis quatuor primùm uncias, tum 8, demum 12, quarum dosium nulla vomitum aut sedem ullam provocavit, licet alioquin vomam perfacilè. Neque apud cæteros amicos meos, quibus dederam, operationem aut perturbationem sensibilem ullam causabatur.

     Itaque habes liberè communicatum accidentalem illum processum, qui derogat nonnihil bonitati menstru Glauberiani, simulque ostendit vires salis alcalisati in corrigendis et in melius mutandis proprietatibus mineralium. Ex hoc experimento intelligas quoque, quàm macilenta et imperfecta res fit vulgaris nostra [Chymistica? faded] quæ rationem nobis dedit hactenus paucorum [admodum? MS torn] experimentorum rationalium et solidorum, quæ [applicæ? MS dirty] possent vel ad usum specialem, vel ad inferendas conclusiones [etc? MS torn]