The Hartlib Papers

Monsieur et tres honorè frere,

Ie vous ay estè cercher auant mon depart pour vous dire A Dieu, ay parlè a vostre homme, et disnay ches Monseigneur L'Ambassadeur pensant vous y trouuer, Ie l'auois suppliè que s'il entendoit ou scauoit chose qui en ces extremitès me pouroit estre vtile et a ma famille, de m'en aduiser par vous, ce qu'Il ne m'ha refusè, Ie vous confesse, que si nous deuons estre assiegè, Ie souhaiterois ma femme, ma fille, mon petit Iacob hors de ce lieu, en autre de refuge, car Ils ne me feront qu'empescher, desireux de patir auec mes freres et de ne leur estre en exemple de pusillanimitè. si donc apprenes quelque bon conseil de vous mesmes, ou dudit Seigneur que I'honore et respecte en mon coeur, aduises moy au plustot selon nostre amitiè. en suite de laquelle Ie vous embrasse en mon ame. vous recommandant et vostre sainct dessein a la protection et benediction de nostre Pere Celeste, ne trouuant aucun fondement au iugement [præpostere?], ce qu I'amplifierois si iauois Loisir. A Dieu trescher frere [pries-le?] pour celui qui est et sera tant qu'Il viura

     Monsieur

                  Vostre bien humble seruiteur

                     et affidè ami   Du Boys

De hanau le 22. 7bre

          1634

A Monsieur

Monsieur Durè.

              [sc?]

           A francfort

            1634

       Mr du Boys

Scr. [Hanaw? altered] -------- 22.[altered] 7ber

Accept Francforti ------------ 23 -------------