The Hartlib Papers

           Admodum Reuerende in Christo Pater

                Domine gratiosissime[altered]

Posteaquam per eam quam Divina clementia cum Reveranda Vestra Dignitate contraxi notitiam propensum Reverendæ Dignitatis Vestræ animum tum in eos quos ipsum Christianum Officium juuare iubet, tum in ea quibus promotis Regno huic aliqua adferri posset utilitas, [citet?] serium desiderium quò nonnulla Mechanica in quibus Regnum hoc aliquem hactenus patitur defectum, facilitarentur perspexissem; facile propensione hac Reverendæ Dignitatis Vestræ in spem futuri Patrocinij [2 words deleted] in rebus huius generis sum erectus. Quocirca qua par est cum animi demissione, ac obseruantia Reverandam Vestram Dignitatem iterum accedo, rogatamque velim ut suum mihi hac in Parte non deneget auxilium, quò ego hisce in Regionibus in quibus me et Familiam meam, diutina hæc Patriæ meæ detinet calamitas[altered] honestam et necessariam sustentationem, per honesta et Regno utilia seruitia (quorum quam sim cupidus satis superque locis quibus decuit hoc in Regno patefeci) mihi comparare possim Idque eò peto confidentius, quia a Reverenda Vestra Dignitate, ea facta est mihi promissio, fore ut Priuilegium ad hæc, tum a Sacra R Majestate tum ab Officiarijs Regni a quibus pro more ista dependent, ad exercenda mea opera impetrem Reverendæ Vestræ Dignitatis ope et auxilio. Sunt Sanè multa insuper præter hoc R Majestatis Priuilegium ad opera mea in Effectum deducenda necessaria, sed in ijs ut amicorum petam [word deleted] <auxilia> æquum est. Visum itaque commodissimum mihi et æquissimum, rem totam hanc ad Honorabilem Equitem Dominum Franciscum Kinaston deferre, eoque cum communicare, ut pote cum ipsius animus ad talia Regno utilitatem allatura sit quoque procliuis et propensus. Certam igitur jam cum eo injui pactionem, hac lege ut commune utrique nostrum a S R M obtineamus Priuilegium Et quidem quantumuis Honoratiss Eques id se facturum promisit et recipit, æquissimum nihilominus et ego duxi, Vestræ Reverandæ Dignitatis, hac in parte [word deleted] <H: ambire> fauorem, ut auxilio mihi suo subueniat et prout spem facit Priuilegium hoc quam poterit fieri citissimè a S R M: impetret. Porrò quicquid mei causa hac in parte <vel in [alia?] quauis re necessaria> a Reverenda Vestra Dignitate fuerit præstitum, id dum compos mei sum ea qua par est Officiorum et Obsequiorum meorum promptitudine, rependere velle, polliceor et promitto

             Reverendæ Vestræ Dignitatati

                   ad omnia paratissimus Officia