The Hartlib Papers

         Vt felix et fausta fiat Reformatio

   Statutorum Academiæ Oxoniensis, iis penes quos sit istiusmodi Authoritas, hæc curæ sunto.

Primo Vt non amplius vel Aristot. aut Platonis, sed Rationis ([nimirum?] rectæ) Suprema sit Authoritas in Exercitus præstandis, quo magis vigeat floreatque Libera Philosophia et ingenua Iuventus

Secundo. Vt Professores et Lectores Publici Studia et Conatus suos egregios, non amplius Interpretationi cujusdam Authoris impenderint (vnde Herculis Columnæ in Intellectuali Mundo defixæ fuerunt, nimirum quia Textum (vt ajunt) transgredi vitii et impudentiæ loco habebatur) Potius a. in posterum sudent ad Augmentationem Literarum promovendam Earumque Desiderata supplenda, quæcunque annotata fuerunt ab incomparabili et defæcato Baconis ingenio, aliisque recentioribus ingeniis. Quod gratum Opus vbi semel præstiterint Venerabili Convocationis Domui præbeant, et (eorum si contigent Consensus) typis mandare publicis.

Tertio. Vt Custos Archivorum obstringatur selectissima quaque MS. et Opera Reip. Literariæ vtilissima non amplius cum blattis et tineis rixari, sed V.C. Domus præsentare et eorum Consensu typis mandare publicis, pariterque Bodlejanæ Bibliothecæ Custos, selectiores et rariores Libros eodem modo, et in eundem finem exhibeat.

Quarto. Non amplius pro materia indispensabili habeatur temporis defectus, sed penes V.C. Domum sit, sua vti prudentia et consilio, prout emerserit occasio, interim Exercitus requisitis

Quinto Vt ad minimum Duo Tutores constituantur in vnaquaque Domo, nec plures quam tres, qui viri sint Probi Docti et ad tale munus aptissimi, quorum Electio vel sit penes Vice-Cancellarium, vel cujuscunque Domus Præfectum. Eorum autem munus sit Iuvenum animos tam Religione Vera, quam Ratione recta Excolere, idque pro virilj, vsque dum Iuvenes 4. vel 5. Annorum spatium in Academia exsolverint.

Sexto. Penes eosdem Tutores sit prudentia et consilio suo vti, de Modo et Methodo instruendj accomodatissima, et sat sit Academiæ, si modo laudabiles et pares ei [Gradui?], quem ambit progressus fecerit Candidatus.

Septimo. Nullum posthac instituatur Iuramentum de Rebus Adiaphoris futuris (quibus insidiari posset Conscientia) aut iis, quæ absolutæ in nostra potestate non sunt, nullumque admittatur adæquatum Objectum Iuramentj, nisi quod fuerit in se simpliciter licitum.

  Octavo. Omnes istæ Ordinationes per Statuta De Concionibus habendis, in vnum confluant nervosum et solidum Concionandi genus, Expositorium scil. cujusmodi Conciones bis vnaquaque Dominica in Templo Academico habeantur./