| Title: | Balthazar Gerbier'S Discourse On Geography, In French |
|---|---|
| Dating: | undated |
| Ref: | 10/2/37A-39B |
[10/2/37A]
De la geographie
Puis que les Sages demeurent d'accord de l'excellence des mots Nosce te ipsum (autresfois ecrits en lettres d'or sur le frontispice du Temple d'Apolon en Delfez) il faut aussi que tout homme avoue qu'il doit cognoistre la matiere delaquelle il est fait, et qu'a moins de vouloir passer pour estranger chez soy il doit auoir une cognoissance de ce grand Tout, puis qu'il en est luy mesme un Abregé; et qu'il doit mespriser de resembler non seullement a la fabuleuse Niobe (que des Poetes ont feint auoir en des yeulx quelle serroit chez elle dans une boitte ou comme ces trois Soeurs qui n'auoyera qu'un seul oeuil entrelles) mais aux plus petits Enfans quand esgarréz a deux pas de leur demeure ils ne sæauroient dire d'ou ils sont: Ie passeray soubs silence le nombre de certains voyageurs qui d'abord qu'ils arriuent en un pais se [foncent?] dans une hostellerie pour y passer leur temps; gens en effect nez comme dans une Bouteille qui par consequent ne voyent jamais que par un trou: Ils n'ont rien veu (disent Ils) parce qu'ils ne se sont souæiez de veoir; A ces gens la il ne faut parler d'autre Geographie[altered] que de celle d'un pot, d'un Tonneau de Heydelbergh, et d'une Caue, puis que la Cuisine est leur Terre ferme, leur Mont Etna la Cheminee; la liqueur du Tonneau leur Mer, les Riuierres et les fleuues celles qui coulent des Verres, et qui passent par le Creux de leur Gozier: Mais c'est a Vous Nobles Amatheurs de la Vertu, et amis de vostre bien [catchword: de]
[10/2/37B]
de cognoistre combien il vous jnporte de sæauoir comment c'est que votre Ame est logée, quelle est sa Mayson. en quelle Ville. Prouince, et en quelle partie du Monde affin que ceste cognoissance la vous serue comme d'escallier vers le lieu de vostre Origine Spirituelle, qui est le plus glorieux et le plus releué Object de Votre Ame. ainsi que la Terre est celuy de Votre Veue
Le Tempteur n'en sæeut [trouuer?] exposer un qui fut plus puissant a Nostre Seigneur Iesus; et puis qu'il s'estoit persuadé de ne luy pouuoir faire offre de plus grand present; C'est auec grande raison que l'home doit apprandre quel est ce present, et dautant plus qu'il n'est pas de besoin de Monter n'y sur les Alpes, n'y sur les Monts Pirenees pour le Veoir, puis qu'en peu de feuilles ses Empires. ses Royaumes, ses Principautez et ses Prouinces paroissent sans bouger d'une Estude, et qu'appres les auoir bien Examinees (sans auoir este tourmenté d'orages) il en retire aussi cest aduantage qu'en peu de moments toutes les parties de la Terre luy sont presentes en son Esprit; ses Nations, leur Lois, Coustumes et Religion. C'est pourquoy la Geographie n'est pas moins necessaire aux Ecclesiastiques pour y considerer le gouuernement Spirituel, et les diuersses sorttes de Religions qui y regnent. quauantageux [catchword: et]
[10/2/38A]
et profitable a la Noblesse pour y enuisager les Empires Royaumes et Principautez ou ils peuuent signaler quelques Heroiques vertus de leurs Courages, et comme dit bien un [
Les Marchants mesme y trouuent du contentement y voyant auec asseurance les ports des divers pais d'ou ils [puisent?] leurs Richesses, et par jcelle ont cela d'auantageux qu'ils ne tremblent pas a l'aspect des pointes Orgeuilleuses des Esceuils qui les menassent d'un Continuel Naufrage:
Aussi est-ce a la Verité l'Oeil clair voyant de toute l'histoire, sans la lumiere de laquelle elle nous est du tout aveugle, ne voyant pas qu'il y ait cognoissance au Monde qui nous approche de plus pres de la Diuinité. Nous representant comme en un Instant le chef d'oeuure le plus acomply de toutes les merueilles du Createur Sa Diuision pour venir a une entierre cognoissance de ses parties se fait en Ciel et Terre. La Terre se peut
[10/2/38B]
enuisager ou comme conjointe en ses parties, ou renfermee de quelques Eaux. La premiere s'appelle Continent Les autres prennent le nom d Isle.
Toute la Terre est diuisée en trois grands Continents Europe, Asie, Affrique, separéz l'un de lautre par la Mer Oceane.
L Europe est diuisée en huit parties de Terre ferme Allemagne. France, Espagne, Grece, Illirie, Hongrie. Pologne, et Scandre, qu'il faut entendre estre les Royaumes de Noruege, Suede et Dannemarc
Les Noms des Rois et Princes
Souuerains
en Europe sont
Ferdinand 3me Empereur des Romains.
Louis 14me Roy de france et de Nauaire.
Philippe 4me Roy d'Espagne:
Charles Roy de la grande Bretagne.
......... Roy de Pologne.
Christine Reine de Suede.
Iean 4me Roy de Portugal.
........ Roy de Dannemarc:
Alexis Michel grand Duc de [Toscaine? altered]
George Rakoci, Prince du Royaume de [Transiluanie?]
Mathias Prince de Walachie.
Lupulo Prince de Moldauie
[10/2/39A]
L'Asie
L'Asie est enuironnée de la Mer Oceane au Septentrion a l'Orient et au Midi, elle a la Mer Rouge a l'Occident qui la separe d'auec L'Affrique, et la borne d Europe[altered] elle est diuisee es neuf parties suiuantes.
Natolie, ou petite Asie. Turcomanie, ou Armenie Sirie, ou Saurie, Arabie ou Ayaman, Perse ou Sophiane. Moscouie ou Russie. Tartarre jadis Scythie, Les Indes et la Chine.
Les Souuerains en L'Asie sont
Hibraim Empereur de Constantinople et de Trebizonde
Kaa-Sophi-mirises. Roy de Perse
Tenin-chim, Roy de la Chine
Xa-ziahan grand Mogol.
Toxogon Empereur du Iapon
Islan-gieray Sultam Muradin grand kam des Tartares.
Baht-gerey kam des petits Tartares Precopes.
Dadram kam. Prince de Mingrelie
Gorel kam, Prince de Georgie.
L'Affrique est enuironnée de Mer de tous costez hormis au detroit de Sues ayant la Mer Mediteranee au Septentrion qui la separe d'auec L Europe, et la Mer Rouge a l'Orient qui la separe de l'Asie, elle est separee en sept parties suiuantes
[10/2/39B]
Barbarie, ou Mauritanie. Bile dulcerid, jadis Numidie. Sarra, jadis Libie desertte. Guinee jadis pais des Garamantes. Zarde, jadis pais d Egipte Ethiopie Superieure. Ethiopie Inferieure
Les Souuerains de L'Affrique sont
Malachegued Sultam Grand Negus dit Prete-jan
Empereur des Abissins ou d'Ethiopie, qui poccedde 17 Royaumes, peuple Chrestien que Phelippe conuertit a la foy. commenæant par L [Enue?] de la Reine Candace.
Moley-el-Gualid. Sultam. Empereur de Barbarie Roy de fez et de Marroc.
Bostanbey Sultam, Prince d'Alger. Roy de Telesim. de Bugie et de Constantine.
Il y a aussi les Rois de Totombut, de Congo. d'Angola, de Monomotapa, ceux cy sond des
On donnera la cognoissance particulliere et exacte par Tables Geographiques en l'Anciclopedie ou Minerue d'Albion laquelle vous dira tout ce qu'il faut obseruer du Globe Terrestre.
Elle vous dira aussi les noms des autres Princes en l'Europpe, et des Princes puisnéz des Maysons Roiales. <left margin: Come aussi> Des hommes Royalles et des femmes plus Illustres de ce Siecle