| Title: | Copy Letter In Hartlib'S Hand, Dury & Hartlib To Johann Von Hoverbeck, In Latin |
|---|---|
| Dating: | 20 April 1650 |
| Ref: | 1/22/1A-2B |
[1/22/1A]
Gratiam et Pacem
Magnifice atque Eximie vir
Quamuis nullo vnquam aut Merito aut obsequio nos Vestræ Magnif. hactenus vel de nomine saltem innotuimus; non tu hoc ab isto scribendi officio nos [retrahere?] potuit. quoniam sc. in publico Generis Humani bono procurando parrhesiam vsurpare non verecundati sumus et præclaram in super Virtutis Vestræ fama atque existimatio quæ ad aures nostras pervenit animum nobis addidit, vt non dubitemus quin ab Hume vestra simus impetraturi quod rogare decrivimus. Etenim non latet nos quanto fauore doctissimum et multis ingenii dotibus [præcellentum?] Virum Dn. D. Kinner sis amplexus quamdiu in viuis erat. Nam et ipse deprædicavit nobis singularem in se suaque studia affectum Tuum, quo illa quæ ad Scholarum Reformationem et Iuventutis Institutionem perfectionem peculiariam ipsi concesserat Dominus, promovere et publicæ luci donare conabaris. Hoc non mediocriter in Sæculo Publicorum studiorum tantopere infrugifero, Spiritus nostros recreavit, tuique nominis Dignitatem singulari tituli nostris affectibus commendavit. Rarum enim est inter Magnates et Principum huius mundi Consiliarios exemplum, inveniri quemquam qui Scholastica curet suove Patrocinio digna existimet: quasi in reformanda humani ingenii cultura nihil sit operæ pretium, aut quod laudem mereatur: sed quo rariora in hoc genere Exempla nunc exstant; [eo?] majori[altered from majore] splendore Virtutis Tuæ excellentia sese exerit et conspicua fit, quod inter omnes solus prodeas Rerum omnibus vtilium prudens æstimator, et Vanitatum Sæculj quibus alii Cogitationes suas inutiliter impendunt stre-
[1/22/1B]
-nuus Contemptor. Nos pro simplicitate nostra candidum attulimus animum, et pro virium tenuitate [indefessam?] adhibuimus conatum ne domini Kinnero Viæ deficerent quibus excellentissimos ingenii sui [fatus?] produceret in lucem, sed antequam omnia aut absolverat, quorum titulos nobis communicaverat, aut nobis transmisit quæ absolverat; præmatura morte nobis fuit ereptus: habemus [tamen?] quædam ab ipso exarata de Scholarum Reformanda Institutione, sed quia illa imperfecta esse judicamus: et significatum nobis præterea est illum Vestræ Magnificæ tradidisse Exemplar suarum in eo genere Meditationum magis absolatum, antequam Deo animam reddidit, ideo enixe rogamus T. Humanitatem Vir Eximie, digneris ea quæ ab ipso habes eo spectantia Scripta nobis non gravata communicare: vt quod autem hac illo viuo nobis erat in animo, nunc illo defuncto persequamur. Impensus transcriptioni necessarias libenter ferimus et per Dn. Niclassius huc transmitti poterit quicquid vsui nostro destinabitur.
Alterum adhuc nobis restat ab Hum. T. efflagitandum et impetrundum. Hoc Spectat Dn. Rittangelium Virum in alio studii genere Eminentem, qui nobis quondam dum fuit hic in Anglia innotuit: Agemus [autem?] illum tui fauoris et beneficentiæ Patrocinio ante [annos?] non ita multos in Asiam profectum esse, vt Caræorum [Monasteria?] sibi comparet quæ publici juris faciat. Igitur singulari nos beneficio Tibi devincies, si quæ de illo Uxisti ex quo a Vobis discessit: vbi jam sit
[1/22/2A]
quid agat, quo successu itineris sui Scopum persecutus sit nobis significare non recusaveris: et si quid specialius de statu Iudeorum in Oriente aut Septentrione ad Te perscripsit, vt eius Apographum nobis largiri velis, [triguæ?] rogamus. Vale in domino et boni consule hanc hominum Tibi ignotorum fiduciam, qui ex animo sese profitentur
Vestræ
Magnificentiæ
Cultores et Observatores
Dabantur Londini Aprilis
10/20 Anno 1650. I. D.
S. H.
[1/22/2B]
Magnifici Nobilissimoque Viro
Domino Ioani ab Höverbeck
Seren. Elect. Brandb.
Consiliario
[.?]
Hohensteinium.