| Title: | Notes On Christ'S Ascension, Cyprian Kinner, In Latin |
|---|---|
| Dating: | 20 May 1648 |
| Ref: | 1/33/35A-B |
| Notes: | Adjunct (littera B) to letter to Hartlib dated 20 May 1648 at 1/33/33. |
[1/33/35A]
Litera. B. Ascensio Christi facta est
I. Veraciter, non in Phantasmate, non allegoricè aut tropicè, sed propriè et verè. Ut enim Filius Dei propter nos, et propter nostram salutem, verè descendit de coelis, juxta Symbolum Nicenum; cùm in utero virginis à Spiritu Sancto conceptus, humanam naturam integram sibi indissolubili foedere copularet: verè natus, ac conspectus est ambulans inter homines, ipse qvoque verus ac naturalis homo, sine tamen peccato: verè etiam pro nobis passus, mortuus, ac sepultus est, & à mortuis resurrexit: ita verè etiam in assumptâ istâ humanitate suâ, in qvâ victima factus fuerat pro nobis, coelos conscendit.
II. Visibiliter: in præsentiâ namque piorum omnium, qvos tunc habebat diligentes ipsum, ac charos discipulos, aspectantibus illis ascendit, et coram oculis eorum sublatus est: qvos hujus suæ ascensionis voluit habere testes [Greek: autóptas]: ut possent toti mundo eam manifestare.
III. Sublimiter, à loco inferiore ad sublimiorem, à terrâ ad coelum, imò super omnes coelos. Ephes. IV, 10. Ebræ. VII, 26.
IV. Convenienter: postqvam discipulos suos, per tres annos et ultra, ante passionem; sed et qvadraginta dies post resurrectionem, fideliter informasset de statu Regni sui; qvòd illud non sit corporale et terrestre, sed spirituale ac coeleste: et Ministerium illis contulisset: promissionem Patris illis repetiisset de mittendo Spiritu Sancto, ejusque visibilibus donis in eosdem effundendis, tum stato tempore ascendit [flourish?] Actor. I, 3. Marci VI, 14.
V. Potenter, Etsi in infirmitate carnis pro nobis mortem perpessus; ut factâ peccatorum nostrorum expiatione, tolleret dissidiam et bellum inter Deum ac homines ortum: non tamen à morte retentus est: sed ipse mortem absorpsit in victoriâ: Esa. XXV, 7: et prostratis omnibus hostibus, cum toto infernali exercitu, tanqvam gigas fortis, publicè triumphans, coelica regna petit.
VI. Magnificenter: non in curru aureo, aut sede eburneâ; ut Triumphatores olim Romani. Ut enim Regnum ejus est spirituale, sine pompâ externâ: ita triumphus ejus spiritualis; Currus, Nubes; Comites, Angelorum exercitûs; (qvi ipsum, ut Regem suum, in assumptâ carne venerantur et adorant, Psal. XCVII. Ebr. 1.) et, ut Patres piè crediderunt, Homines sancti illi, qvi post gloriosam Christi resurrectionem è monumentis suis prodierant, multisque in sanctâ civitate apparuerant. Ideò dicitur Psal: LXVIII, <18:> Currum Dei esse myriadas multorum millium.
VII. Efficaciter; dividens dona Hominibus, nempe Spiritum Sanctum regeneratorem et innovatorem confractæ naturæ nostræ; Iustitiam, Fidem, Spem, et Vitam æternam: ubi Triumphatorem nostrum visuri sumus in seculorum omnium æternitates. Amen.
