| Title: | Letter, Cyprian Kinner To Hartlib, In Latin |
|---|---|
| Dating: | 27 November 1648 |
| Ref: | 1/33/98A-B |
[1/33/98A]
<Hartlib: No 32. 17/27 Nov. 1648.>
Salutem et Officia. Heri ad te scripsi, Hartlibi clarissime: misique copiam Epistolæ <à> Petro Figulo ad me pridie scriptæ, unà cum responso meo; et historiâ Belli Germanici. Addita qvoque fuit epistola, à fratre tuo ad te destinata. Et Cùm ergo Nauta, cui hæc credere debuit Franciscus Sandersonius, hodie adhuc nobiscum sit: et hac ipsâ horâ 21´ illos Imperiales è manu Domini Niclassii acceperim: commodùm te eâdem hac occasione de accepto ære informare possum. Accipies itaque hîc apocham meam, epistolæ illi Niclassianæ antiqvæ inscriptam, uti volebas: & amicas tibi pro isto subsidio habeo gratias. Post octiduum mittam aliam adhuc apocham: si fortè ista pereat. Ad 5/15 Ianuarii 1649. funeratio Vladislai IV. Regis nostri [piæ memoriæ?] instituetur; postridie, 7/17 Ianuarii coronatio Casimiri IV: qvam 12/22 excipiet publica totius Regni Diæta. Cosacorum irruptiones accelerant istas solennitates: qvarum exitum novit Deus. Portenta et Ostenta in nostrâ Borussiâ indies increbescunt magis magisque. Qvid sibi ea velint: facilè est cogitare. Pillaviæ portum et munimentum Elector Brandenburgensis. fertur ad aliqvot annos locasse Batavis: si verò ipsi militem cessisse dicuntur: qvem Elector ( in si ve<ra narrant) in> Pomeraniam adducat. Si sic: vacillat Germanica pax. Pragam à Cæsarianis remperatam alii perhibent; alii post recuperationem iterum à Svecis occupatam. Silesii non bonas satis pacis conditiones, in religionis negotio, obtinuerunt. Hinc suspirant, lamentantur, et tantùm non desperant <extorres, de reditu>. Deus omnia dirigat ad nostram salutem! Cui.te tuosque commendo fideliter. Vale. Gedani, 17/27 Novembris 1648.
Tui observantissimus
Cyprianus Kinnerus.
Non processit intentio cum Mercatore: de qvâ heri scripsi. Expeditissimum ergò fuerit: ut ages cum Ioanne Edvardo vestro. Ille enim ad nostrum Franciscum Sandersonium, juvenem admodùm officiosum, et tuas; et hic ad Eduardum meas, compendiosè curare potest.
